Ekkert að frétta...

...annað en að ég hellti sjóðandi vatni yfir bumbuna á mér og uppskar 3 stórar brunablöðrur á bumbuna og sár. Hafi drengurinn ætlað sér að koma í heiminn í nótt þá er ég eflaust búin að hræða hann svo mikið að hann lætur ekki sjá sig fyrr en í fyrsta lagi um mánaðamótin! Ætli ég verði ekki bara send í gangsetningu í byrjun nóvember, svei mér þá. Það verður þá í síðasta lagi 6. nóvember.

Annars er ég merkilega róleg, miklu rólegri en ég hefði haldið svona miðað við að vera gengin 2 daga fram yfir, hafandi haldið í 9 mánuði að ég myndi fæða í allra síðasta lagi 23. október og líklegast fyrir settan dag. Ég er til dæmis mun rólegri núna en ég var á mánudag, þriðjudag og miðvikudag. Svo þegar fimmtudagurinn, hinn margumtalaði SETTI DAGUR, var liðinn þá var eins og ég yrði bara nokkuð slök. Auðvitað er ég spennt, eða réttara sagt að deyja úr spenningi yfir því að sjá litla hnoðrann en ég er ekkert frústreruð eða geðvond.. eða það held ég að minnsta kosti ekki! Kannski er þó vissara að spyrja Hjört álits hvað þetta varðar...

Jæja, ég ætla að fara að horfa á e-a bíómynd þar sem Mike Myers leikur kolrangeygðan starfsmann hjá flugfélagi, allt of vel girtur og sinnir því starfi að þjálfa nýjar flugfreyjur í starfi. Frekar sjúklegur karakter sýnist mér.

Góða helgarrest!

SETTUR DAGUR!

Langar bara að benda ykkur á litla barnið sem liggur hérna til vinstri á síðunni. Þar segir sem sagt "0 weeks and 0 days to go". Ótrúlegt hvað þetta hefur liðið hratt. Nú er bara að sjá hvort drengurinn verði jafn stundvís og systir hans sem fæddist á settum degi. Ég man að ég vakti til kl. 2 nóttina áður en ég átti Önnu Dúfu, þá sat ég reyndar og skrifaði í lokaverkefninu mínu en núna sit ég og sinni mjög svo óprófessjónal verkefni; sit og er að hlusta á Queen í bland við Ragnhildi Gísladóttur syngja "Eitt lítið jólalag" í riiiiisastórum heddfónum! Mér finnst einhvern veginn mjög svo viðeigandi að vaka til 2 þessa nótt fyrir settan dag. Maður veit aldrei nema það hafi verið vakan sem gerði gæfumuninn 14. janúar 2007! Hvað veit maður?!

Dagurinn var annars mjög fínn, byrjaði á því að fara með lúsina mína á leikskólann og svo fór ég ásamt ferfætlingnum í morgunkaffi til Völu. Eftir það hélt ég heim á leið og lagði mig í heila 2 tíma, sem er líklega ástæðan fyrir hinum ótrúlega hressleika akkúrat núna. Sótti síðan leikskólaskottið og við fórum heim að dunda okkur og svo út að leika. Eyddi síðan kvöldinu í að baka snúða sem ég einhverra hluta vegna er búin að vera með á heilanum undanfarna daga; kanelsnúða með marsípani eftir uppskrift frá Brynhildi bestaskinni vinkonu. Það var greinilega vel þess virði að hafa verið með þessa snúðaþráhyggju því þeir bragðast hreint wunderbar vel! Magnið varð reyndar brjálæðislegt, er að hugsa um að fara með ca. 20 stykki á vöggustofuna á morgun og fara svo bara út í strætóskýli og deila ca. 100 stykkjum út til þreyttra og svangra nemenda sem hanga og bíða eftir hinum vonlausa strætisvagni sem kemur iðulega of seint. Nú, restina, ca. 40 stykki, get ég svo dundað mér við að borða sjálf.

Nú ætla ég hins vegar að fara að bursta tennur og fara að sofa enda klukkan farin að nálgast 2 og músin vaknar víst alveg ábyggilega á sínum vanalega tíma þótt mamma hennar sé í syngjandi sveiflu langt fram á nótt, núna að hlusta á Stevie Wonder syngja "Isn't she lovely" sem var einmitt spilað á Rás 1 eða 2 daginn sem ég fæddist með kveðju til mömmu frá fyrrum vinnufélögum hennar á Útvarpinu.

...og svo að lokum þá var bumbumyndin að þessu sinni tekin í kvöld, sem sagt 39 vikna og 6 daga gömul bumba takk fyrir. Á barnalandi eru síðan fullt af nýjum og gömlum bumbumyndum ásamt myndum af aðalstjörnu þeirrar síðu.

Biðin endalausa

Já, ég er svo sannarlega farin að bíða. Þegar ég gekk með Önnu Dúfu var ég sannfærð um að ég myndi ganga minnst viku fram yfir svo ég var ekkert farin að bíða. Ég var meira að segja búin að skipuleggja fund 14. janúar með einum af kennurunum úti í deild hjá mér því hann ætlaði að hjálpa mér með ákveðinn hluta lokaverkefnisins. Ég var alveg handviss um að stúlkan myndi fæðast í fyrsta lagi 20. janúar svo ég sat sultuslök alla daga og öll kvöld og skrifaði lus í verkefninu mínu. Ég man einmitt að ég sat til kl. 2 nóttina áður en Anna Dúfa fæddist og fékk svo fyrstu hríð 6 klukkustundum síðar.

Það að ég skyldi eiga á settum degi síðast hefur gert það að verkum núna, að ég er farin að bíða óþreyjufull eftir komu drengsins og var farin að gera það strax um helgina. Það hefur eflaust haft einhver áhrif á mig líka að mér var sagt af ljósmóður á spítalanum að það væri algengt að konur ættu aðeins fyrir tímann ef það liði stuttur tími á milli tveggja meðgangna.

Nú, svo sagði pabbi mér að hann hefði dreymt sjálfan sig í nótt í skemmtigarði með lítinn dökkhærðan dreng. Pabbi er ansi berdreyminn og hefur oft dreymt fyrir hluti og samtöl sem eiga sér jafnvel orðrétt stað einhverju síðar. Ekki það, þessi draumur hans mun auðvitað koma fram í raunveruleikanum fyrr eða síðar en ég er svona að vona að hann sé að dreyma fyrir því að hann fæðist mjöööög fljótlega.

Annars leiddist mér svo í gær að það var alveg sorglegt. Stundum er maður svona, ég hefði vel getað fundið mér eitthvað að gera en fannst ég ekki geta gert NEITT! Átti ekkert að lesa, engin verkefni hérna heima fyrir sem ég gat sinnt, og allt almennt frekar leiðinlegt. Í dag er ég hins vegar búin að finna mér nokkur góð verkefni, ég ætla að taka klæðaskápinn hans Hjartar í gegn-hann er vonlaus hvað varðar skipulag í skápum (segir Monica Geller konan hans og hristir höfuðið full vandlætingar) og þar sem ég hef lítið sem ekkert að gera þá ætla ég að ganga í þetta mál fyrir hann. Svo ætla ég að baka kanelsnúða þótt mér leiðist gerbakstur óskaplega. Það er samt eitthvað svo huggulegt við það að baka svona snúða og ennþá huggulegra að borða þá með ískaldri mjólk! Svo ætla ég að sofa alveg slatta. Ég er búin að lofa sjálfri mér því að leggja mig á hverjum degi fram að fæðingu, jafnvel þótt mér finnist ég ekkert þreytt. Það margborgar sig þegar kemur að fæðingunni og ég tala nú ekki um tímabilið á eftir sem getur verið erfitt þótt það sé auðvitað að mestu leyti bara dásamlegt.

En jæja, best að hella sér út í verkefni dagsins! Svo er bara að sjá hvort ég finni mér eitthvað að gera á morgun. Það má þá alltaf hanga í tölvunni ef í harðbakkann slær...

Barnseignarleyfið og bumban 39 vikna og 2 daga gömul

Jæja. Það var ýmislegt sem ég ætlaði mér að gera í barnseignarleyfinu en bjóst einhvern veginn við að ég myndi ekki nenna að framkvæma allt sem stóð á what-to-do-listanum sem ég var búin að gera (ég ELSKA lista og geri lista yfir allt!). Nú er ég hins vegar búin með hvert einasta atriði á listanum sem er dálítið sorglegt því nú tekur bara biðin við. Þetta er það sem ég er búin að dunda mér við undanfarnar 2 vikur síðan leyfið hófst:

• Ganga frá fötum litla bróður og gera herbergið hennar AD endanlega klárt


• Fara í klippingu


• Fara í plokkun og handsnyrtingu


• Fara í bíó með eiginmanninum


• Fara í bæjarferð og á kaffihús


• Klára að skrifa útdrátt úr grein (grein sem ég er ekki búin að skrifa reyndar, þannig að þetta var svona ímyndaður útdráttur)


• Ljúka síðustu smáatriðum í vinnunni, alls konar lítil verkefni sem náðist ekki að klára fyrir leyfið


• Baka fílakaramelluköku (hún var lovely, takk fyrir uppskriftina Arngunnur mín)


• Klára sænsku krimmabókina mína


• Stooppa í gat á nýja sængurverinu hans litla snúðs

Þetta er svona það sem ég man eftir. Mikið af tímanum hef ég nú bara eytt í tölvugláp en því miður ekki nógu mikið í svefn og hvíld. Ég lofa sjálfri mér því t.d. á hverjum morgni þegar ég skreiðist fram úr með Önnu Dúfu upp úr klukkan 7 að ég muni fara snemma að sofa að kvöldi þess tiltekna dags. Það gerist því miður mjög sjaldan, ég veit ekki hvaða hangs er á mér öll kvöld. Það kannast víst margir við þetta, ekki satt?

Annars er allt gott að frétta af mér svona heilsufarslega séð. Ég var að vonast til að allt færi af stað eftir gærdaginn en þá fór ég í bæinn með Völu og gekk allt Strikið, fór í búðir og mátaði skó, borðaði heavy kryddaðan börger á BurgerKing en það virðist ekki hafa virkað. Ég er samt alltaf að fá einhverja litla verki en samt ekkert "alvöru". Ég er farin að bíða mjöööög spennt eftir því mómenti sem ég fæ fyrstu hríðina, get hreinlega ekki beðið! Við erum búin að ordna öllu með pössun fyrir AD og það er almennt allt tilbúið fyrir komu litla snúðsins; rúmið hans er tilbúið og vagninn sömuleiðis, búið að sjóða fyrir hann pínuaggalitlar snuddur, pakka heimferðarfötum fyrir hann niður í tösku (og sömuleiðis á mömmuna). Nú tekur þess vegna bara biðin við...

Læt að lokum fylgja með bumbumynd vikunnar sem sýnir hversu praktísk bumban er orðin; ég get notað hana sem hillu undir músina! Þetta er samt vonandi ein af síðustu bumbumyndunum. Góða helgi öll sömul.

Bumban: 38 vikna og 4 daga gömul

Ég var að athuga hvort ég sæi á mér tærnar...

...ég sá ekki eina einustu og grunar að ég sé ekki með neinar lengur.

Bumban: 35 vikna og 3 daga gömul

Þessi mynd var tekin í dag í sunnudagsgöngutúr fjölskyldunnar á nærliggjandi sumarhúsasvæði.

Bumban: 34 vikna og 2 daga gömul

Þessi mynd var tekin úti á háskólasvæði í gær í göngutúr með familíunni.

Gaviscon...

...er undrameðalið sem bjargar mér trekk í trekk þessa dagana. Undrameðal þetta myndar froðu sem leggst ofan á magaopið svo magasýrur nái ekki að laumast upp í hálsinn á viðkomandi... viðkomandi being me. Nú er drengurinn farinn að þrýsta svo á magann á mér og almennt öll líffæri að ég á orðið erfitt með að, tja nánast allt; sofa, borða, anda, you name it! Líklega verður þetta þó skárra þegar hann fer að síga svolítið og er búinn að skorða sig almennilega niðri í grindinni. Eins og er líður mér minnst x1 á dag eins og ég sé að springa! Annað hvort er ég með þrefalt lag af legvatni eða þá að drengurinn er töluvert stærri en systir hans. Nema líffærin í mér séu bara hreinlega að taka vaxtarkipp og þess vegna sé almennt orðið frekar plásslítið innan í mér? Þykir þetta síðastnefnda þó afar ólíklegt.

Annars var helgin góð, við hvíldum okkur og höfðum það gott og gerðum mest lítið. Jú, við fórum á kaffihús og McDonalds og kíktum líka í Ikea. Ég hafði komið auga á ansi sætan sófa í nýjasta Ikea bæklingnum og við ætluðum að skoða hann aðeins nánar en hann var svo skelfilega ljótur greyið að við nenntum ekki einu sinni að setjast í hann til að prófa hann. Er helst farin að hallast að því að kaupa stóran og feitan sófa með dumbrauðu riffluðu flauelisáklæði. Verst að eiginmanninum líst svona heldur illa á þá hugmynd. Sjáum til hvort sölumaður dauðans nær ekki að fá hann til að skipta um skoðun á næsta mánuði eða svo...

Er annars í vinnunni, var að koma af tónleikum hjá grænlenskum kór sem var hreint út sagt lovely! Þau voru 16 en hljómuðu eins og 50 manna kór, og ekki skemmir hvað grænlenska er heillandi mál. Ég sat bara alveg tárvot og svei mér þá ef drengurinn fékk ekki hikstakast á miðjum tónleikum. Hann hefur verið svona snortinn litli snúðurinn.

Jæja, best að enda á hinni týpísku setningu sem ég get bara sagt næstu 4 vikurnar: Farin að vinna!

Klukkeddíklukk

Ég var klukkuð af Arngunni vinkonu og sambumbu, og hér eru svörin mín:

Fjögur störf sem ég hef unnið um ævina

• Aðhlynning og skúringar á Hrafnistu
• Svaraði í símann hjá LÍN tvö sumur
• Aðhlynning þroskaheftra og fatlaðra á m.a. Bjarkarási og á sambýli á Álftanesi
• Doktorsnemi við DTU, sem er jú launað starf :)

Fjórir staðir sem ég hef búið á

• Fellahverfið
• Norður Karólína í USA
• Álaborg
• Kaupmannahöfn

Fjórar bíómyndir sem ég held upp á

• Deer Hunter
• Thelma & Louise
• Sound of Music
• Með allt á hreinu

Fjórir sjónvarpsþættir sem mér líkar

• Desperate Housewives
• Forbrydelsen, besta krimmasería sem ég hef séð, 20 þættir
• Prison Break (1. og 2. serían, hef ekki fylgst með því nýjasta)
• American Idol (flokkast það ekki undir þætti?)

Fjórir staðir sem ég hef heimsótt í fríum

• Munaðarnes
• Mallorca
• Portúgal
• London

Fjórar síður sem ég skoða daglega, fyrir utan blogg

• Draumabörn
• Trendsales
• Hotmail (ekki hotmale)
• RÚV

Fernt sem ég held upp á matarkyns

Guð, þetta verður nú erfitt fyrir mig, ég er svo agalega lítið fyrir mat-ég er svona týpan sem borða til að lifa en ekki öfugt... NOT!

• Góðar súkkulaðikökur með þykku kremi
• Gul kiwi
• Gráðostur
• Fiskibollur með sítrónusósu og rifnum gulrótum

Fjórar bækur sem ég hef lesið oft
Ég ætla að breyta þessu í "Fjórar bækur sem ég hef lesið oftar en einu sinni", ég man ekki eftir neinni bók sem ég hef lesið OFTOFTOFT, nema ef vera skyldi e-r barnabækur þegar maður var á Önnu Dúfu aldri en þeim er ég löngu búin að gleyma...

• Íslandsklukkan
• Dagbók Bridget Jones
• Bækurnar eftir Arnald Indriðason
• Sjálfstætt fólk

Svo ætla ég að klukka Helgu frænku, Birnu, Helenu og Öbbu.

Vil líka benda á að það eru tvær nýjar færslur hérna fyrir neðan...

Halló! Halló, er e-r heima?!

Það er líklega ekki það allra sniðugasta að leyfa 19 mánaða dóttur sinni að leika sér með gsm síma foreldra sinna; alla vega hefur minn eitthvað skaddast í höndunum-eða munninum-á skottinu því hann er hættur að virka. Þegar ég hringi í fólk þá heyri ég í viðkomandi þegar hann svarar en fólk heyrir ekkert í mér-mjög draugalegt! Ég er samt svo mikill lúði með svona hluti að mér var eiginlega slétt sama og sendi bara sms í staðinn. Hjörtur er ögn skynsamari því það er auðvitað hreint ekkert sneddí að vera á síðustu vikum meðgöngunnar með bilaðan síma. Hann pantaði þess vegna handa mér nýjan síma áðan, ansi stelpulegan og sætan. Hér er hann litla krúttið, síminn sem sagt, ekki Hjörtur...

Bumban: 32 vikna og 1 dags gömul

Bumban að elda, hvað annað?

Bumban: 31 vikna og 3 daga gömul

Bumbumynd vikunnar var tekin á Østerbro þegar ég var gengin 31 viku og 3 daga með. Værsgo'